Mehmaan Tha

Sard seena-e-shab mein utra sahar ka garm khanjar/
Awr phir jo har-ja aasmaan tha, so lahu-lohaan tha

Yun toh gham ke sad-hazaar walwale uthte dil mein the/
Jaan jo lab pe aayee thi, ye sabab main bezubaan tha

Aap toh khurshid, baadshah-e-falak ek harf bhi na bola/
Lab-e-naseem-o-ru-e-gul par lekin us ka bayaan tha

Jo beeti raah-e-wafa par, zaahir hai sab chehre pe/
Dekh ke naqsha apna darya mein, main bhi kuchh hairaan tha

Chand roz raha yahaan Sifar, kuchh padha, chal guzra/
Bas itna fasaana hai uska, aakhir ko mehmaan tha

Wah-Wah

Sun kar kal shab ghazal meri karte the woh "wah-wah"/
Magar aaj sar-e-raah kya mukarte the woh wah-wah

Utarti hai jaise mai chhanakti hui pyaale mein/
Is weeraan khaana-e-dil mein utarte the woh wah-wah

Kahne ko toh unhe ham mein koi dilchaspi na thi/
Lekin roz-e-mulaakaat yun sanwarte the woh wah-wah

Hamne jo junoon-e-ishq ek baar jaan di so di/
Afsos khauf-e-ruswaai mein roz marte the woh wah-wah

Guzri ho naseem-e-sahar gulistaan se jis tarha/
Yun baagh-e-khayaal se mere guzarte the woh wah-wah

Aise toh raaz-e-haq ke aashiq awr bhi the Sifar/
Magar chaihre se haqeeqat ke darte the woh wah-wah