Ghazalon, geeton, naghmon ka saudagar hoon main
Kabhi soya hua sa, Sifar, kabhi ujaagar hoon main
Kuchh nazmein hain mere paas, dard mein lipti hui
Kucch aadhi-adhoori si hain, aur hain kuchh nipti hui
Sahmi hui si hain kuchh, maano mehbooba aashiq se ho rubaru
Aur kuchh hain mahekti hui, goya ke zulf-e-yaar ki ho khushboo
Sheyr hain kayee aise, jinka har harf maanind-e-lahu aankhon se tapka hai
Aur kuchh aise bhi hain, ke jaise koi angaara-e-khayaal falak ki ore lapka hai
Hain kuchh itne siyah, ke jaise bin-mahtab ki siyah-tareen raat
Aur kuchh itne raushan, ke maano mehr-e-neemroz ki ho baat
Kuchh ghazalon mein hai woh haya, ke jaise nazren jhukaane ki ho aadat
Aur kuchh rakhti hain dil par woh asar, ke jaise ho shor-e-shahaadat
Kuchh mein woh siyah-masti hai, ke jaise saqi ne tamaam maikhana pilaaya ho
Aur kuchh mein hai aisa khauf, ke maanon waqt-e-qayaamat aaya ho
Ghazalon, geeton, naghmon ka saudagar hoon main
Kabhi soya hua sa, Sifar, kabhi ujaagar hoon main
No comments:
Post a Comment